هند بر ادامه همکاری‌های صحی و کمک‌های بشردوستانه به افغانستان تأکید کرد

حکومت هند بار دیگر از تداوم کمک‌های بشردوستانه و همکاری‌های صحی با افغانستان اطمینان داده و اعلام کرده است که تأمین درازمدت ادویه‌های ضروری از اولویت‌های همکاری میان دو کشور است. براساس معلومات وزارت صحت و رفاه خانوادهٔ هند، جی‌پی ندا، وزیر صحت این کشور، با نورجلال جلالی، وزیر صحت عامهٔ افغانستان دیدار و گفت‌وگو کرده است. در این دیدار، دو طرف روی تقویت همکاری‌ها در بخش صحت و رسیدگی به نیازهای فوری صحی مردم افغانستان بحث کرده‌اند. همچنان در جریان این دیدار، به گونه نمادین محموله‌ای از ادویه‌های درمان سرطان و واکسین‌ها به افغانستان سپرده شده است. وزارت صحت هند اعلام کرده است که یک محموله بزرگ شامل ادویه‌ها، واکسین‌ها و یک دستگاه سی‌تی‌اسکن ۱۲۸ اسلایس نیز در چارچوب کمک‌های بشردوستانه به افغانستان ارسال خواهد شد.